Sinnerrek ti National Bureau of Investigation (NBI) ita laeng nga aldaw dagiti mapapati a paglemlemmengan ni sigud a Bureau of Corrections (BuCor) chief Gerald Bantag idiay Laguna ken Caloocan City tapno maiserbi ti warrant of arrest kontra kenkuana ngem saan a nasarakan sadiay ni Bantag.
Impatungpal ti National Bureau of Investigation ti “raid” kalpasan a nakaawatda ti impormasion a naimatangan ni Bantag iti nasao a lugar manipod iti maysa a source dagitoy.
Sigun kadagiti “agents” ti nasao nga ahensia, napaliiw dagiti kaaruba ti mapapati a balay ni Bantag nga adda ti panaggaraw iti uneg ti balay ngem dagos metlaeng a pumanpanaw dagiti indibidual.
Iti maysa a balay ni Bantag idiay Santa Rosa, Laguna, nagaramat ti NBI ti sledgehammer tapno makastrekda iti balay.
Indeklarada nga awan ti tao iti uneg ti balay idiay Santa Rosa kalpasan ti sumagmamano a minutos a panagsapul.
Nu pay kasta, nasarakanda ti siam a bala iti uneg ti pagtaengan nga addaan ti petsa nga Abril 2.
Kabayatanna, nu pay saanda a nadanonan ni Bantag iti balayna idiay Caloocan, nasarakan dagiti operatiba ti sumagmamano a paltog kasta met dagiti personal effects a mapapati a kukua ni Bantag.
Iti agdama, agtultuloy latta ti panagsapulda kenni Bantag.
Maipalagip a mapapati a mastermind ni sigud a Bureau of Corrections (BuCor) chief Gerald Bantag ti pannakapapatay ti broadcaster a ni Percy Lapid.
