BAGUIO CITY – Binabalaw manen ni Baguio City Mayor Benjamin Magalong dagiti mapapati a substandards a patrabaho ti Baguio City District Engineering Office (BCDEO).
Dinakamatna a manipud iti lima a patrabaho ti nasao nga opisina ket ket tallo laeng ti pimmasa iti naipatungpal nga inspeksionda idi napalabas a lawas.
Kinunana nga agingga ita ket agtultuloy ti panagaramid ti BCDEO iti substandard a patrabaho nupay nalawag ti kampanya ni Department of Works and Highways (DPWH) Sec. Mark Villar a saan a maiparbeng ti korapsyon iti uneg ti ahensia.
Innayon ni Mayor Magalong nga adon a proyekto ti inaramid ti BCDEO ngem saanda nga inkonsulta ken inkoordinar iti komunidad ken kadagiti maseknan nga opisyal.
Imbinglayna pay nga indanonnan iti DPWH Central Office ti iregularidad ken saan a de-kalidad a proyekto ti BCDEO isut gapuna a mangnamnama daytoy a maikkaten iti pwesto ni BCDEO District Engineer Rene Zarate.
Manarimaan met ti panagala ti Bombo Radyo Baguio iti dasig ni BCDEO District Engineer Rene Zarate seknan iti nasao nga isyu.
