Napasamak ti mapapati nga abduction sadiay Sitio An-anaao, Brgy. Budac, Tayum, Abra iti alas dies trentay uno iti rabii itay kanikadua.
Nupay kasta, naireport laeng daytoy kadagiti otoridad iti alas dose y media iti parbangon idi laeng kalman.
Nabigbig ti biktima a ni Croseldo Turalba Abad, agtawen ti 29, awanan asawa, construction worker ken residente metlaeng iti nadakamat a lugar bayat a ti suspek ket saan pay a nabigbig.
Iti inisyal a report, naipakaammo laeng ti nasao nga insidente iti nadakamat nga oras babaen iti panagtext ni Dondel Turalba Abad, agtawen ti 27, awanan asawa, construction worker, ken kabsat ti biktima iti hotline number ti Tayum Municipal Police Station no sadino impakaammona nga adda ti innem nga indibidual a naka-tubemask ken bullcap nga umas-asideg iti pagtaenganda bayat a nakaidda daytoy iti dayon iti sango ti pagtaengan dagitoy.
Sigun kenkuana, pinilit dagiti suspek a sinumrek iti uneg ti pagtaenganda nga pilit wenno pwersaan nga inalada ti kabsatna.
Gapu iti butengna ket naglemmeng ken naguray agingga a pimmanaw dagiti innem a suspek a nangala iti kabsatna.
Dagus met a nagturong dagiti pulis iti metlaeng mismo a nakapasamakan ti insidente.
Iti sabali a bangir, dua metlaeng a bangkay ti nasarakan iti nagsina a lugar sadiay Tayum, Abra no sadino iti imbestigasyon dagiti otoridad, nabigbig ti maysa a residente sadiay Barangay Budac, Tayum bayat a ti kaduana ket tubo sadiay Aparri, Cagayan.
