BAGUIO CITY – Insingasing ni Cordillera Regional DRRM Council chairperson ken Office of Civil Defense – Cordillera Regional Director Albert Mogol ti panakaisayangkat ti mapping kadagiti kabambantayan iti probinsia ti Benguet a kanayon a pakapaspasamakan ti uram.
Sigun kenkuana, babaen iti daytoy ket maimplementar dagiti water impounding projects iti kaasitgan a disso kadagitoy wenno saan ket iti panakailatag dagiti kaskenan nga addang ken aksiyon.
Kiniddawna met ti panangisumitir ti Benguet Provincial DRRM Council ken ti Provincial Environment and Natural Resources Office (PENRO) – Benguet iti project proposal seknan iti aksion kontra kadagiti forest fires tapnu aksiyonan ti Cordillera Regional DRRM Council wenno saan ket maipangato iti central office ti National DRRM Council para iti panakaipaluspos ti pondo no pagkasapulan.
Dinakamatna nga iti itataud dagiti nagduduma a pakaseknan a mangituntunda iti peggad iti publiko kas iti insidente dagiti uram ket kasapulan ita ti panagkaykaysa ken panagtinnulong dagiti maseknan nga ahensia ken opisina.
Nagbalin a reaksiyonna daytoy iti apela ti PENRO-Benguet para iti panagkaykaysa dagiti addang iti kampanya ken laban iti mapaspasamak a panakauram ti nalalawa a paset dagiti kabambantayan iti probinsia.
Immunan nga inreport ni PENRO head Edgardo Flor a minilmilyon a pisos ti gatad dagiti dadael nga itunda dagiti forest fires iti nagduduma a munisipyo ti Benguet ita a tawen.
