Nakumpiskar dagiti operatiba ti Philippine Drug Enforcement Agency-Cordillera Baguio/Benguet ken Mt. Province Provincial Office ti dried marijuana leaves ken nakemmeg ti dua a drug personalities bayat ti buy-bust operation a naisayangkat idi kalman idiay Burnham-Legarda, Baguio City.
Iti pannakiuman ti Bombo Radyo kenni Rosel G. Sarmiento, Public Information Officer ti PDEA-Cordillera, kinunana a ti nakumpiskar a dried marijuana leaves ket agdagsen ti 21 kilograms ken agbalor ti P2,520,000.00.
Dagiti met suspek ket lallaki nga agtawen ti 43 manipod Bakun, Benguet ken agtawen ti 53 manipod Cabanatuan, Nueva Ecija.
Sigun kenni Sarmiento, naala manipod kadagitoy ti 20 a pidaso ti dried marijuana bricks ken maysa nga elongated form kalpasan a nakitransaksionda iti undercover agent.
Iti inisial nga imbestigasion ti nasao nga ahensia, nagtaud dagiti marijuana iti probinsya ti Benguet.
Naikabil dagitoy iti dua a bag a saan a maipagarup a mapagduaduan.
Kinunana ni Sarmiento a nabayagen a bambantayanda dagiti nasao nga indibidual.
Maibasar iti rekord, siguden a natiliw ti lalaki manipod Cabanatuan, Nueva Ecija ken daytoy ti maikadua a gundaway a nakemmeg daytoy gaputa inaklonna a daytoyen ti trabahona.
Iti agdama, adda dagitoy iti kostodiya ti PDEA-Cordillera, ken mapilaan dagitoy iti reklamo gapu iti panaglabsingda ti Republic Act 9165 wenno ti Comprehensive Dangerous Drugs Act of 2002.
Kabayatanna, guyguyuguyen ni Sarmiento ti publiko nga ireport dagiti indibidual a mapagduaduaan nga agar-aramat wenno agilaklako ti iligal a droga.
