Umapapela ti Baguio Tourism Council (BTC) kadagiti ahensya ti gobierno a mangipatpatungpal ti distribusyon iti food packs ken relief packages a saan a malaokan iti maris politika.
Sigun kenni BTC Chairman Gladys Vergara, kasapulan nga awan ti politiko a manggundaway iti sitwasyon nu sadino agparparang a dagitoy ti nagtaudan dagiti maiwarwaras a tulong ken assistance nangruna kadagiti naapektaran ti didigra.
Kinuna ni Vergara a dagiti ayuda wenno tulong a maibunong ket agtalinaed nga awan impluwensya dagiti politiko.
Innayonna pay a naobserbaran ti presensya dagiti dadduma a city officials iti maipapaay nga ayuda nu sadino ket arignan nga agparparikna ken agkamkampanya dagitoy.
Kidkiddawen pay ti BTC Chair kadagiti agdama nga city officials a liklikanda kuma ti agparang kadagiti aid distribution gapu iti sabali nga intensyonda ditoy nu sadino ket ipangpangrunada ti political agendada.
Napateg nga iparikna iti kommunidad ti prinsipyo ti fairness ken transparency para iti maisaksakad a good governance.
Impannakkel pay ni Vergara ti administrasyon ni Baguio City Mayor Benjamin Magalong gapu iti adbokasiyana a good governance ken anti-corruption nu sadino, kasapulan nga agkaykaysa ti tunggal ahensya ti gobierno a saan nga agpa-allilaw kadagiti politiko nga agar-aramat kadagitoy a sitwasyon para iti political ambition dagitoy.
