Naituding nga agsubli ni Mary Jane Veloso iti Pilipinas sakbay ti panagramak ti Paskua kalpasan ti sangapulo ket uppat a tawen a pannakaibaludna idiay Indonesia.
Sigun kenni Indonesian Minister for Human Rights and Corrections Yusril Ihza Mahendra, nabagaan daytoy manipod kenni President Prabowo Subianto a ni Veloso ket maiyakar iti pagilian a Pilipinas sakbay ti nasao nga pasken.
Impaganetget ti nasao nga opisial nga awan ti aniaman a kiddawda kasukat ti pannakaiyakar ni Veloso iti Pilipinas.
Inladawan ni Mahendra ti kaso ni Veloso kas “nakaskasdaaw” kalpasan a daytoy ket nakalinya iti death row iti nasurok a maysa a dekada.
Imbinglay ti nasao nga opisial a narigatan ti napalabas nga administrasion a mangdesision iti kaso ni Veloso gapu iti kinakurang ti linteg ken pangibasaran tapno maisubli iti nagtaudan a pagilian ni Veloso.
Ngem gapu iti agtultuloy a negosasion iti nagbaetan ti gobierno ti Pilipinas ken Indonesia ket napirmaan ti pannakaiyakar ni Veloso iti Pilipinas.
Babaen ti panagrobar ni Subianto, mabalinen a maipasubli ni Veloso iti aniaman nga oras sakbay iti Paskua.
