BAGUIO CITY- Karit ita iti Philippine Drug Enforcement Agency (PDEA) Cordillera iti panangipatungpalda iti operasyon ti marijuana eradication ti masansan a panagtudtudo ditoy lokalidad.
Iti interview ti Bombo Radyo Baguio ken Rosel Sarmiento, pannakangiwat ti PDEA Cordillera, saan a maliklikan a lumangto ken umado a dagus dagiti mula a marijuana gapu ta masibugan dagitoy iti tudo.
Nupay kasta, kinunana nga agtultuloy ken ikagumaanda nga ipatungpal ti operasyonda iti eradikasyon.
Malaksid iti dayta, agtultuloy metlaeng dagiti dadduma nga operasyonda kontra iti iligal a droga a makatiltiliwan dagiti babassit ken dadakkel a drug personalities.
Kinunana nga agingga adda iti suplay ti iligal a droga ket saanda nga agsardeng a mangkemmeg kadagiti agiwarwaras wenno agilaklako ken agar aramat iti daytoy.
Kagiddan iti dayta, kinunana nga adda laengen iti 63 a barangays iti rehiyon a masapol a madalusan kontra iti iligal a droga.
Malaksid iti dayta, kinunana a nakasaganada latta a mangituloy ti kampanya kontra iti iligal a droga uray masukatan ti agdama nga administrasyon wenno adda man dagiti mabaliwan a linteg mainaig iti operasyon dagitoy.
