BAGUIO CITY – Mangisayangkat ti lokal a gobierno ti La Trinidad, Benguet iti mass testing kadagiti sektor a narisgo iti COVID-19 mangrugi ita nga aldaw agingga inton huwebes (hunyo 10).
Karaman ditoy dagiti agtrabtrabaho sadiay La Trinidad Trading Post, public market ken dadduma pay a business establishment iti nasao a municipyo.
Sigun kenni Mayor Romeo Salda, puntiryada nga ipasidong iti RT-PCR test dagiti sangaribo nga indibidual babaen iti test kits nga indonar ti Bases Conversion and Development Authority (BCDA).
Kinunana a numan agkurang dagiti naisagana a test kits ket agkiddawda manen iti BCDA tapno maakomodar dagiti saan paylaeng a naipaisidong iti swab testing.
Inlawlawagna a nasken a maipasidong iti swab test dagiti nadakamat a sektor tapno maamoan no natalged dagitoy iti COVID-19 nangruna ta dagitoy dagiti saan a sumursurot kadagiti minimum health standards.
Impanamnamana met a saanda nga ipalubos ti home quarantine kadagiti agpositibo iti nasao a sakit gaputa nakasaganan dagiti isolation facilities a pakaiturongan dagitoy.
Ti munisipyo ti La Trinidad ti umuna a munisipyo iti Benguet a mangisayangkat iti mass testing gapu paylaeng iti kinababa ti testing capacity ti probinsya.
Kabayatana, mangisayangkat ti La Trinidad, Benguet iti COVID-19 vaccination inton hunyo 10 agingga hunyo 11 sadiay Benguet State University Gymnasium.
Daytoy ti kaunaan a dose ti Sinovac vaccine a maibakuna kadagiti healthcare frontliners, senior citizen ken persons with commorbidities.
Gapu iti daytoy, amin nga indibidual a nakapagrehistro iti online ket nakaawatda ti mensahe ita nga aldaw tapno makumpirmar no agpabakuna dagitoy iti nasao nga iskidyul.
Kasapulan met a mangipresenta dagiti persons with co-morbidities iti medical certificate, prescription dagiti agas, hospital records kas ti discharge summary and medical abstract; surgical records and pathology reports kas pamaneknek a karaman dagitoy iti A3 priority group.
