BAGUIO CITY – Silulukat ni Mayor Mauricio Domogan iti singasing dagiti night market vendors a panakailaylayon ti operasyon dagitoy.
Nupay kasta, kinunana a daytoy ket no nainget a tungpalen dagiti agilaklako iti night market dagiti agdama a linteg ken pagalagadan iti umno a panakaibasura dagiti maurnong a rugit wenno basura dagitoy.
Kinunana a mabalin a mailaylayon iti agingga parbangon ti operasyon ti night market ngem saan a mabalin a maisapa ti operasyon dagitoy gaputa okoparenda ti maysa a linya ti Harrison Road nga agresulta met iti parikut iti trapiko ken kadagiti pasahero.
Innayonna a kapatangda dagiti maseknan a vendors ken ti Baguio City Market Authority (BCMA) tapnu maisimpa dagiti posible a tumaod a parikut.
Sigun pay iti mayor, sukimaten ti BCMA ti panagtungpal dagiti nasurok sangaribo a night market vendors kadagiti agdama a linteg ken pagalagadan iti operasyon ti night market.
