Umap-apela ni Baguio City Mayor Benjamin Magalong kadagiti kameng iti Department of Public Works and Highways(DPWH) a palagipanda dagiti kontraktor a responsable iti construction site iti paset ti Kennon Road a pagtalinaidenda ti kinaurnos ken kinadalus iti nasao a disso.
Iti panakiuman ti Bombo Radyo kenni Baguio City mayor Benjamin Magalong, adu dagiti naobserbaranda nga hazards ken debri iti paset ti manarimaan a konstruksyon rason nga inyunay-unayna a masapol ti naing-inget a panakasupervise iti daytoy.
Sigun iti mayor, mabayag pay sakbay a malpas dagiti manarimaan a konstruksyon nangruna iti paset iti Camp 2.
Mainaig iti dayta,impetteng ni Mayor Magalong a masapol ti nasao nga imprastraktura ti naan-anay a panakabantay nangruna ta mapaspasaran ti panagdalapos dagiti agsasaruno a bagyo.
Iti sabali a bangir imbinglay ti local chief executive a saan a naikonsulta iti lokal a gobyerno iti siudad ti maar-aramid a parking area asideg iti Lion’s Head.
Sigun kenni Magalong, awan ti stakeholder engagement a napasamak sakbay a narugyan ti nasao a proyekto ken awanan metlaeng daytoy iti clearance manipod iti Department of Emvironment and Natural Resources (DENR).
Inaklon ti mayor a nasdaaw dagitoy a nangaramid ti maysa a national agency iti proyekto a saan a naikoordinar iti lokal a gobyerno iti siudad.
Innayon ni Magalong a pangpanggependa nga iyaramidan daytoy iti tourism center ngem saan pay a sigurado dagiti nakatungtongda a kontraktor nu ti nasao a disso ket natalged.
Kagiddan dayta, inyunay-unay daytoy nga ipawpawilda ti panagpark iti nasao a disso nangruna nu panagtutudo gapu ta narisgu daytoy ken natural a pagdaldalanan iti danum.//Bombo Rob Dominguez
