Idagdagadag ni Baguio City Mayor Benjamin Magalong iti Independent Commission on Infrastructure (ICI) a paayaban ni sigud a Marikina City 2nd District representative Stella Quimbo tapno ilawlawag ti mapapati a pannakairamanna iti alokasyon ti P300 million iti sidong ti Medical Assistance for Indigents Program (MAIP) ti Department of Health.
Sigun kenni Magalong, naklaat daytoy idi naduktalanna manipod iti maysa a dokumento a ni Quimbo ket mapapati a nakaawat ti nagdakkel nga alokasion manipod iti MAIP, ken kinuwestunarna ti kinapatas ti panangiwaras ti pondo.
Kinunana a rumbeng a patas koma ti pannakaiwaras daytoy ngem naklaat idi nakitana ti gatad, ken inyebkasna nu kasano kabileg dagitoy iti takem.
Kinumpirmar ni Magalong a naimatanganna ti dokumento ngem kasapulan pay a ma-validate daytoy.
Nupay kasta, agtaltalinaed ti takderna a rumbeng a patas ti pannakaiwaras para iti medical assistance funds.
Maipalagip a dinakamat ni Navotas Rep. Toby Tiangco itay laeng kallabes a karaman ni Stella Quimbo iti “small committee” a nangi-introduce ti sumagmamano a pannaka-amyendar ken “insertions” iti 2025 national budget.
Maibasar pay iti rekord, maiparparangarang a nangiyemplementar ti opisina ni Quimbo iti uppat nga infrastructure projects iti distritona babaen iti maysa a kompanya a kukua dagiti kontrobersial a contractors a da Curlee ken Discaya, nga im-imbestigaran ita ti ICI gapu iti naanomalyaan a flood control projects.
Awan pay ti inruar ni Quimbo a komento mainaig iti nasao a banag.
Iti agdama, manarimaan ti imbestigasion ti ICI kadagiti iregularidad ti flood control projects iti sidong ti Department of Public Works and Highways. Sumagmamano a mammanday-linteg, kontraktor, ken opisial ti publiko ti naayabanen a mangpaneknek iti panagimbestigar.
Nagserbi ni Quimbo a kas pannakabagi ti Marikina iti 2nd District manipud 2019 agingga 2025 ken naabak iti panagkandidatona kas mayor iti eleksion idi 2025.
