Kinarit ni Baguio City Mayor Benjamin Magalong ti Land Transportation Franchising and Regulatory Board (LTFRB) a dagitoy ti mangimando metlaeng iti trapiko iti kanito nga aprobranda ti panangiserrek iti 100 full electric sedan taxis (e-taxi) iti siudad ti Baguio.
Impeksa ni Mayor Magalong ti pannakadismayana gapu iti mapapati a panagaprobrar iti LTFRB dagiti prangkisa nga awanan iti konsultasion iti lokal a gobierno kasta metten iti regional ken field offices. Kinunana nga ad-adda nga ammo iti lokal a gobierno ti aktwal a kasasaad iti kalsada, bayat a limitado laeng ti pannakaamo ti nasao nga ahensia ken ti panagaprobar laeng kadagiti prangkisa a saanda a pampanunoten ti kasasaad iti kalsada.
Innayon pay ni Magalong a naminsannan a kinomprontar ti ahensia gapu iti ibagbagada nga agkasapulan pay iti ad-adu a taxi iti siudad, a sigun kenkuana ket saan a pudno ken rumbeng a nakabasar iti datos.
Impaganetgetna a nu agtuloy ti nasao a panagaprobar, nakasagana daytoy a mangipila iti kaso kontra iti LTFRB. Kinaritna ti ahensia nga iturong iti siudad dahiti personel ti nasao nga ahensia tapno mapadasanda mismo ti nakaro a trapiko.
Dinakamat ni Mayor Magalong, maibasar iti datos, nga 8% laeng ti trapiko ket manipod iti public utility jeepneys (PUJ), bayat a 42% met ket manipod kadagiti taxi—pammaneknek iti dakkel a bingay iti nalabes a kinaadu iti taxi iti panagilet iti gunay iti trapiko.
Iti baet daytoy, kinuna ni Magalong a nalukat daytoy iti iseserrek iti e-taxi, ngem rumbeng a maipatungpal ti pagalagadan a “1:1” wenno maysa nga unit ti sumrek kasukat iti maysa nga unit nga umalis.
Maipalagip nga immuna a nagkedked ni Mayor Magalong iti singasing a panangideploy iti sangagasut nga e-taxi iti siudad, gapu iti danag a kumaro iti trapiko ken kinakurang iti konsultasion iti lokal a gobierno.
Ti nasao a singasing ket impila iti Design Green and Smart Corporation babaen iti subsidiary daytoy a Romansa Mobility Land Transport Service, nga agkidkiddaw iti endorsement manipod iti siudad para iti prangkisa iti Land Transportation Franchising and Regulatory Board (LTFRB).
Sigun kenni Magalong, saanna nga aprobrana ti plano iti agdama gaputa mapapati a nadanonen iti siudad ti limitasion iti bilang dagiti taxi.
Immuna metlaeng nga impaganetget ni Mayor Magalong a ti aniaman a kanayunan a lugan ket rumbeng a sumurot iti “one-in, one-out” tapno maipasigurado a saan a manayunan ti pakabuklan a bilang dagiti lugan iti kalsada.
