Idagdagadag dagiti sumagmamano a labor groups kenni Mayor Benjamin Magalong nga aglosulos daytoy iti takemna kas mayor iti siudad ti Baguio kalpasan a dinutukan daytoy ni President Ferdinand R. Marcos Jr. kas special advisor ti Independent Commission for Infrastructure (ICI), ti komisyon a nadutukan a mangimbestigar iti maatap a korupsyon iti infrastructure project iti pagilian.
Sigun iti Nagkaisa Labor Coalition, nasken nga aglosulos daytoy tapno makapagpokus iti naipaay a baro a takemna.
Kinuna ni Nagkaisa chair and Federation of Free Workers president Sonny Matula a ti panagtrabaho kas mayor ken imbestigador ket possible a makaipaay iti risgo bayat ti nasao nga imbestigasyon.
Nupay kasta, immunan nga inyebkas ni Mayor Magalong ti commitment-na nga agtalinaed kas mayor iti siudad ti Baguio.
