BAGUIO CITY – Mangnamnama ni Baguio City Mayor Benjamin Magalong a mabasa ken ipangag wenno suruten ti agdama a dadaulo ti Philippine National Police (PNP) ti mensahe iti social media post ni sigud a PNP chief Arturo Lomibao.
Sigun kenkuana, napintas ti mensahe ti nasao a post ni Gen. Lomibao.
Kinunana a maipaayan met iti panawen ni PNP chief Gen. Oscar Albayalye nga agpalawag ken mangdalus iti nagan daytoy iti publiko.
Nupay kasta, impetteng ti sigud a dadaulo ti PNP-CIDG a ti kapatgan ken nasken a maaramid ita ket ti panangispal ni Gen. Albayalde iti institusyon ti nasyonal a pulisya.
Innayonna a saan pay a naudi ti amin tapnu ispalen ti dadaulo ti PNP ti organisasyon ken adda ti umdas a panawen daytoy a mangaramid iti nasao nga addang.
Inlanad ni Gen. Lomibao iti post-na a da Magalong ken Albayalde ket sigud a comrades-in-arms, agpada a produkto ti Philippine Military Academy (PMA) ken general officers a nagserbi iti sidongna ken nagbalin pay dagitoy a napateg a paset ti panagserbisyona.
Kinunana a kas sigud a dadaulo ti PNP ken produkto ti PMA ket saanna a maliklikan a maapektaran ken mapasaktan nangruna ta am-ammona ti dua a heneral kagiddan ti panangibingayna iti lagipna kadagitoy.
Nupay kasta, inaklon ni Gen. Lomibao nga adda ti higher interests a nasken a maprotektaran ken pagalagadan a nasken a masurot isut gapuna a saan a maliklikan nga agsango ti dua a heneral.
Imbalakadna pay kenni PNP Chief Albayalde nga inawaganna a ‘Chief Oca’ ti panagretiro daytoy nga imetna ti service reputation daytoy kas strict disciplinarian a rason tapnu pilyen ni Presidente Duterte kas dadaulo ti PNP nga uray saan dagitoy a nasinged iti tunggal maysa.
Kinunana a nasken nga agbalin a sensitibo ni Albayalde iti public perception kagiddan ti panangisingasingna iti nainget a panangipa-imbestigar ti PNP chief iti kaso dagiti ninja cops.
Kinunana nga iti kanito a malpas ti imbestigasyon ken maiparang ti kinapudno ket ditoy metten a mabalin nga agikkat iti pwesto ni Gen. Albayalde nga uray pay maysa nga aldaw sakbay ti panagretiro daytoy.
Impetteng ni Gen. Lomibao a nasken nga ipakita ni Gen. Albayalde a nakasagana daytoy nga agsakripisyo para iti institution a panawanna tapnu daytoy ti agserbi a clear signal kadagiti maibati iti serbisyo.
Naudi nga imbilin ti sigud a dadaulo ti PNP ti panangispal ni Gen. Albayalde iti institusyon ti pulisya.
