BAGUIO CITY – Naayatan ti publiko kenni Baguio City Mayor Benjamin Magalong iti panakipasetda nga agasawa iti naipatungpal a Zombie Walk sadiay Session Road idi malem kalman.
Nagbalin a center of attraction ti Egyptian-inspired a costume ti mayor a kadwana ti asawana.
Iti rugi ti parada, saan a dagos a nadlaw ti panakipaset ti Mayor iti nasao nga aktibidad gaputa saan a kadawyan a maiparparang iti publiko ti nakita a bisngay ti ama ti siudad idi kalman isut gapuna a nagado dagiti nangala iti ladawan ken naki-selfie iti mayor.
Saan a nasurot ti immunan a naplano a ruta ti naipatungpal Zombie Walk idi malem kalman gapo kadagiti saan a napakpakadaan a pasamak.
Maipalagip a nagrugi ti Zombie Walk sadiay Upper Session Road a nagturong iti Lower Session Road, iti Magsaysay Avenue, Y-shape Overpass agingga sadiay Abanao Overpass.
Nupay kasta, gapu iti killaat a panakaisara ti pababa a linya ti Session Road para iti nasao a parada a nangituda iti nakaro a kinailet ti tarapiko iti lugar ken ti kinaado dagiti tao a nagbuya ken nakipaset, nagdesisyon dagiti organizers nga ag-U turn a dagos sadiay lower Session road imbes koma a dumalan sadiay Centermall.
Iti laksid iti daytoy, nagbalin a naballigi ti naipatungpal a Zombie Walk kas paset ti maikadua nga aldaw ti Karkarna Festival 2019 ti siudad iti panakalagip ti Piyesta dagiti minatay.
Nailukat iti amin ti naisayangkat nga aktibidad ken adda pay ti naipaay a libre a zombie make-up para kadagiti nakipaset malaksid iti naipatungpal a treat or trick activity para kadagiti ubbing.
Nakita met ti presensia dagiti otoridad iti intero nga aktibidad partikular ti Baguio City Police Office – Station 7 ken ti Public Order and Safety Division a nangwananawan iti seguridad ti publiko.
Nagleppas ti aktibidad agarop alas-sais ti sardam idi kalman.
