Sinungbatan ni Baguio City Mayor Benjamin Magalong ti kiddaw ti Malakanyang a paneknekanna ti kinunana a ti 2025 national budget ket mapapati a maar-aramat kas “election fund” wenno pondo para iti eleksyon.
Iti pannakiuman ti Bombo Radyo kenkuana, kinunana a nalatak a ti ebedensya ket adda metlaeng iti sangwananda ngem saanda laeng a kayat a sangnguen daytoy.
Sigun kenni Magalong, maawatanna dagiti impeksa ni Palace Press Undersecretary Claire Castro ngem impaganetgetna nga adda metlaeng kadakuada ti ebidensya.
Impeksana nga idi napalabas a tawen ket kellaat ti kaadda ti P26 million nga Ayuda sa Kapos ang Kita Program nga awanan iti umno a guidelines no sadino kinunana a dakkel daytoy a pammaneknek nga adda iti pakainaigan dagiti politiko.
Kinunana pay a nakaawat daytoy iti mensahe seknan iti nasao a banag a nakanagan kadagiti congressman ken makita metlaeng dagiti ebedensya iti social media post dagiti mismo metlaeng a congressman.
Malaksid iti dayta, impettengna nga adda ti big ken small group iti bicameral no sadino adda dagiti tallo nga indibidual a mangidadaulo iti daytoy.
Nupay kasta saannan nga innaganan dagitoy.
Innayonna a ti kasapulan laeng nga aramiden ti malakanyang ket agsao ngem ketdi maipabakbaklay kadakuada ti parikut.
