BAGUIO CITY – Naladingitan ni Atok Mayor Reymondo Sarac iti naduktalana nga insidente ti panagmula iti marijuana iti masakupanna a munisipyo.
Kasaruno daytoy ti panakaparut dagiti pinuon ti marijuana iti tallo a nagsisina a plantasyon sadiay Oyusan, Cattubo, Atok babaen iti insayangkat nga operasion ti PDEA-Cordillera itay nabiit.
Kinunana a gapu iti nasao nga insidente ket namantsaan ti minmintenarenda a kinadalus ti munisipyo manipud iti marijuana.
Nupay kasta, impettengna a nagtaod sadiay Mt. Province ti agtagikua kadagiti nasao a mula ngem naikamang laeng iti nadakamatna a lugar.
Inaklonna a naklaat daytoy gaputa asideg bassit iti kalsada ti garden a nakaimulaan dagiti marijuana.
Atapenna a naigagara ti panakaimula dagiti marijuana ken panang-insulto ti intensyon ti agtagikua kadagitoy.
Inayonna nga iparparang ti agtagikua nga awan ti ar-aramiden dagiti opisyal pakairamanan dagiti otoridad ken mangipaspasimudaag a kasla binaybay-anda a maimula ti marijuana.
Inkalintegan pay ni Mayor Sarac a saan a kinarigat ti biag ti rason no apay a naimula ti marijuana gaputa asideg ti garden iti national highway.
Gapu iti daytoy, kidkiddawenna manen ti naan-anay a koordinasyon ken komunikasyon dagiti opisyal tunggal barangay tapno dagus nga iyumanda no adda ti maobserbaranda nga agmulmula iti marijuana.
