Tiniliw manen dagiti security guards iti kadakelan a mall iti siudad ti maysa a babae a nabigbig kas alyas ‘Mary Chris Bucao’, 30-anyos, awanan trabaho ken residente ti Pantal Norte, Dagupan City, Pangasinan, kalpasan a nagtakaw manen daytoy iti uneg ti nasao a mall.
Iti inisyal nga imbestigasyon ti kapulisan, mannarimaan ti panangipatungpal ti roving patrol ti maysa nga empleyado iti bags section iti nakitada ti maysa a pamilyar a babae nga asasistaran ti maysa a saleslady.
Inobserbaran daytoy ti empleyado ken dita na metlaeng a nakumpirmar a ti nasao a babae ket isu metlaeng ti naarestarda ken naprosecute idi tawen 2023 rason tapno limedna nga inmonitor ti garaw daytoy.
Iti panangmonitorna, dumanon iti P4,687.00 a gatad ti assorted bags ti inkabil ti babae iti shopping basketna sakbay a nagturong daytoy iti cashier.
Nupay kasta, bayat nga adda daytoy iti cashier, killat a pimmanaw ti babae ket nagrikos-rikos iti ground floor sakbay a napan iti maysa a secluded area.
Dita metten a nakita ti empleyado nga inyalis ti suspek dagiti innalana nga items iti backpackna sakbay a rinumwar daytoy iti entrance-exit ti upper grounds.
Sakbay a makapanaw ti suspek, inasitgan a dagos daytoy ti empleyado ket sinapulna ti resibo dagiti items no sadino awan ti maipakita ti babae.
Dagiti nasao nga items, naduktalan a saanna a binayadan.
Gapu iti dayta, naeskortan daytoy paturong iti customer relations office para iti dokumentasyon.
Nangipila metten dagitoy iti pormal a reklamo kontra iti suspek.
Naiturong ti babae ken dagiti ebidensiya iti istasyon ti pulis para iti umno a disposisyon. // via Bombo Noveh Organo
