TUBA, BENGUET- Pimmusay ti 48-anyos a babae, storekeeper ken residente ti Sahaya, Taloy Sur, Tuba, Benguet kalpasan a nadungpar ti lugan idi Mayo 1, 2026.
Maibasar iti inisyal nga imbestigasyon ti Tuba Municipal Station, maysa nga estudyante a foreign national ti driver ti lugan a nakadungpar iti biktima.
Iti kanayonan a report dagiti awtoridad, ti suspek ken dagiti kakaduana nga estudyante a foreign national, bin-ig a residente iti Baguio City ket paturong idiay La Union idi napasamak ti insidente.
Sigun pay kadagiti otoridad, maatap a mechanical error partikular ti saan a panagkuri iti preno ti rason iti pannakadungpar ti biktima a magmagna iti igid ti kalsada.
Gapu iti napigsa nga impact, naipurwak ti biktima iti kanal. Dagus met a naitaray daytoy iti ospital babaen iti nagresponde nga ambulansiya ti Bureau of Fire Protection – Tuba ngem naideklara a dead on arrival gapu iti dunor ken severe traumatic brain injury.
Iti agdama ket malamlamayan ti biktima iti pagtaenganda. Agtultuloy met ti imbestigasyon dagiti otoridad iti napasamak nga aksidente.//Bombo Noveh Organo
