Mairereklamo ti maysa nga opisyal iti saanen madakamat a barangay iti Baguio City kalpasan a maatap a saanna nga inaksyonan ti parikut iti maysa kadagiti residente iti masakupanna a lugar.
Iti panakiuman ti Bombo Radyo iti agrekreklamo a residente, kinunana nga idi paylaeng napalpalabas a tawen ti nasao a suppiat iti pamilya dagitoy.
Namintallo metten a nangipatungpal dagiti maseknan nga opisyales iti barangay iti panagdengngeg.
Nupay kasta,kayat manen ti nasao a residente a lukatan ti kaso tapno maminpingsan a marisut ken makapag-urnosda iti pamilyana.
Iti met panangala iti Bombo Radyo iti benneg iti maseknan nga opisyal iti barangay, pinaglibakanna ti akusasyon nga awan ti inaramidna a solusyon mainaig iti nasao a pakaseknan gapu ta tallo a daras a nagpaayab daytoy iti panagdengngeg.
Babaen iti nasao a tignay, impagarop ti opisyal a narisuten ti suppiat gapu ta nagsangit a naginnarakop dagiti maseknan iti sangwananda.
Gapu iti dayta, naklaat ti opisyal idi kayat manen ti complainant a malukatan ti kaso.
Malaksid iti dayta, inlawlawag ti opisyal nga awan ti kankanununganna ken kinunananga iti kinapudno ket maasian pay daytoy iti nasao a residente.
Kinuna met ti kapitan nga iti kanito a malukatan manen ti kaso,posible nga ad-adda a kumaro ti gulo a mapasamak.
Innayonna a ti makitkita a solusyon ket ti panagparang ti asawa ti complainant gapu ta patienna nga isu ti tulbek tapnu masulbar ti problema ti nasao a pamilya.
Immunan metlaeng a kinuna ti complainant a saanna a pulos a nakitkita ti asawana sipud idi nangrugi ti parikut dagitoy a pamilya.
Kagiddan dayta, iti panakiuman ti Bombo Radyo kenni Rocky Aliping, presidente ti liga ng mga barangay, kinunana a possible a ma-dismiss, ma-suspinder wenno ma-terminate ti barangay official depende iti desisyon ti konseho nu saanna nga asikasuen ti pagrebbenganna.
Kinunana pay a nu umdas dagiti ebidensya dagitoy ket mabalin dagitoy nga agdiretso iti council tapnu agipila iti kaso ngem mabalin latta dagitoy nga agturong ti opisina iti liga ng mga barangay tapno mapagtungtungan daytoy.
Impeksa met ni Aliping nga adun dagiti nakaskasuan administratively a barangay officials gapu ti saan dagitoy a panangsango iti responsibilidadda.//Bombo Noveh Organo
