Naarestar ti maysa a Filipina teacher sadiay Thailand kalpasan a maipagarup a nangibati iti pimmusay a maladaga iti uneg ti banio ti mall idi March 20, 2026.
Sigun iti Philippine Embassy sadiay Bangkok, naarestar ti nasao nga overseas Filipino worker (OFW) iti maysa a bus station, sumagmamano nga oras kalpasan a pimmanaw iti mall.
Saan metten nga innaganan ti nasao nga embahada ti mannursuro, ngem nagtaud daytoy sadiay Mindanao.
Sigun kenni Don Pancog, labor attaché ti Pilipinas sadiay Thailand, maysa a concerned citizen ti nakadiskubre iti natay a maladaga no sadino, dagus a naipakaammo kadagiti maseknan nga otoridad.
Naarestar ti nasao a manursuro kalpasan a nasukimat ti CCTV footage.
Innayon ni Pancog a napilitan nga impasngay ti mannursuro ti maladaga iti uneg ti maysa a bathroom cubicles.
Innayon daytoy a saan paylaeng a naduktaln ti medical reason ngem kinunana a posible nga adda ti pakainaigan ti nabara panawen sadiay Thailand.
Kabayatanna, saan metten a nakaipaay iti nalawag a pammalawag ti nasao a mannursuro kadagiti opisial ti embahada ti pagilian.
Nupay kasta, agsangsangit ken agbabawi daytoy bayat ti pannakipagsarita dagiti maseknan nga opisiales ti embahada.
Sigun kenni Charmaine Guevara, Chargé d’Affaires ti Embahada ti Pilipinas sadiay Thailand, mentally stressed ti mannursuro.
Iti inisyal nga imbestigasyon ti Embahada ti Pilipinas sadiay Bangkok, rumrumuar a saan nga ammo ti mannursuro a masikog idi simmangpet sadiay Thailand tapno agtrabaho idi October 2025.
Sigun kadagiti otoridad, pito a bulan ti sikogna idi napamasak ti insidente.
Iti agdama, agtultuloy ti imbestigasyon ti pulisya iti nasao a pagilian para iti posible a pannakaipila ti kaso a murder wenno infanticide kontra iti mannursuro.
Naipaayan metten daytoy iti abogado babaen iti embahada ti Pilipinas.
Malaksid iti dayta, manamnama a maipaayan metlaeng iti medical ken psychosocial, no palubusan dagiti maseknan nga otoridad sadiay Thailand.
Kabayatanna, kidkiddawen dagiti maseknan nga opisial ti panagannad ti publiko iti panagkomento iti nasao a kaso gaputa saan pay nga ammo ti pakabuklan nga estoria ti nasao nga OFW.
