Nagballaag ti maysa a human rights and public interest advocacy group a mabalin nga adda epekto ti imbestigasyon ti Department of Justice (DOJ) iti anti-drug war ti administrasion ni sigud a Presidente Duterte iti panagimbestigar ti International Criminal Court (ICC).
Daytoy ket gaputa manarimaanen ti panakitinnulong ti Task Force EJK iti National Bureau of Investigation ken ti Philippine National Police iti panagurnong ken panagsukimat kadagiti ebidensia.
Ti task force ket makikikoordinar iti House Quad Committe, nagduduma a komite iti Senado ken iti Commission on Human Rights (CHR) tapno mangala ti resulta iti imbestigasion dagitoy.
Sigun kenni Justice Secretary Jesus Crispin Remulla, posible a mapilaan ti reklamo ni sigud a President Rodrigo Duterte gapu iti panaglabsingna ti RA 9851 wenno ti International Humanitarian Law, Genocide, and Other Crimes Against Humanity.
Kabayatanna, sigun iti Commission on Human Rights (CHR), tallo a krimen babaen ti RA 9851 ken dadduma pay a krimen kontra iti sangkataoan ti mabalin a mausar kontra kadagiti tattao iti likudan ti drug war, ngem saan nga umdas tapno mangsungbat kadakuada.
Sigun met iti human rights and public interest advocacy group a Center for International Law (Centerlaw), daytoy ti umuna a reklamo a maipila babaen ti RA 9851 iti pagilian.
Kinuna ti Centerlaw nga adda ti posible nga epektona iti panagimbestigar iti pagilian seknan iti war on drugs ni sigud a President Duterte iti imbestigasion ti ICC.
Gapu iti dayta, insuhesion ti nasao a grupo a liklikan ti gobierno dagiti petsa ti imbestigasion ti ICC.
