Naarestar ti maysa a kameng iti Philippine Coast Guard(PCG) kalpasan a natiliwan nga agilaklako kadagiti high-powered loose firearms.
Naarestar daytoy babaen iti operasyon nga impatungpal dagiti kameng iti Criminal Investigation and Detection Group(CIDG) idiay Barangay San Isidro, San Simon, Pampanga idi laeng napan a lawas.
Sigun kenni CIDG Public Information Officer Police Major Helen Dela Cruz,ti suspek ket maysa nga aktibo a kameng iti Philippine Coast Guard a naduktalan nga agilaklako kadagiti saan a lisensyado a paltog online.
Nakipagtransaksyon daytoy kadagiti kameng iti CIDG Pampanga Provincial Field Unit nu sadino, ti paltog partikular ti rifle a ginandatna nga ilako ket agbalor iti ₱110,000.
Rumrumwar met iti imbestigasyon dagiti otoridad a damo paylaeng ti suspek nga agilako kadagiti paltog ken dukduktalenda paylaeng nu siasino ti suplayer daytoy kasta metten dagiti puntiryana a lakkoan.
Iti agdama, nakabaluden ti saanen nainaganan a suspek iti headquarters ti CIDG Pampanga ken sumangsango daytoy iti kaso a panaglabsing iti Comprehensive Firearms and Ammunition Regulation Act, ken iti Cybercrime Prevention Act.
Impeksa met ti PCG a saanda a kunsintien ti iligal nga aramid ti maysa kadagiti miembro daytoy.
