LA TRINIDAD, BENGUET – Sumangsango iti kaso a panaglabsing iti RA 9165 ti maysa a kumakanta kalpasan a natiliwan nga aglaklako iti maatap a shabu sadiay Longlong, Puguis, La Trinidad idi kalman.
Nabigbig daytoy a Ricky Andoy Kuito, 41-anyos, naasawaan, tubo iti Mankayan, Benguet ken residente iti Cabanao, Balili, La Trinidad.
Natiliw ni Kuito kalpasan a ginandatna nga aglako iti maysa a pakete ti maatap a shabu iti maysa a pulis a nagpammarang kas buyer.
Nakumpiskar manipud kenkuana ti dua a pakete ti shabu nga agdagsen iti 0.99 a gramo ken aggatad iti 6,712; maysa a cellular phone ken boodle money.
Naiturong ti suspek iti La Trinidad Municipal Police Station ken dagiti ebidensiya para iti umno a dokumentasyon sakbay a maipama daytoy iti korte.
