Ammo yo kadi a mala-teleserye ti pakastoryaan ti biag ti maysa a lalaki idiay China?
Naipasngay daytoy iti maysa a hospital ngem tinakaw daytoy ti maysa a doktor ken dimmakkel pay daytoy iti narigat a pamilya isu’t gapuna a saan a nakaturpos daytoy iti panagadalna.
Naamuanna laeng ti agpaypayso a katatao daytoy idi agtawenen iti tallo pulo ket tallo ngem ti nakaragragsak ket anak pay gayam daytoy ti milyonaryo.
Nangrugi ti insidente idi nagpasngay ni Mrs. Li iti maysa a hospital idiay Zheijang China, uray innem a bulan paylaeng ti ubing iti uneg ti tyan daytoy.
Gapu ta kurang paylaeng ti bulan daytoy, imbaga ti doktor a pimmusay ti nasao nga ubing, patien met daytoy dagiti agasawa.
Sigun iti pudpudno nga ama ni Zhang saan dagitoy a nakita idi ubing paylaeng, awan metlaeng ti ammon ti asawa daytoy gaputa naipasidong iti general anaesthesia idiay a panawen.
Ti saanda nga ammo sibibiag gayam ti ubing ngem tinakaw laeng ti doktor tapno ipadawatna iti kabagyanna a saan a makaanak.
Ngem idi pimmusay ti adoptive father ni Zhang, impudno amin daytoy ti imbilangna nga ina, rason a rinugyanna daytoy a biruken dagiti pudpudno a pamilyana.
Babaen iti tulong dagiti pulis sadiay, nabirukan metlaeng dagiti pudpudno a nagannak daytoy.
Nakumpirmar dagiti milyonaryo nga agasawa a pudpudno nga anakda ni Zhang babaen iti resulta ti DNA.
Gapu iti daytoy, pinasangbay dagiti pudpudno a nagannakna iti nakaragragsak a selebrasyon ken nirigaluan pay dagitoy iti CNY 1.2 million wenno katukad nasurok P9.7 million.
Saan met dagitoy nga impakaamo no mangipila dagitoy iti kaso kontra iti doktor ken iti nasao a hospital.//Rose
