Naarestar ti 35-anyos a lalaki kalpasan a nagtakaw iti innem a pidaso ti smoked meat wenno “kiniing” iti maysa a pasdek sadiay Session-Governor Pack Road, Baguio city.
Nabigbig daytoy, nga awanan asawa ken trabaho ken residente sadiay Tuding, Itogon, Benguet.
Iti initial nga imbestigasyon nga insayangkat dagiti otoridad, napasamak ti panagtakaw bayat a makumikom ti saleslady ken ti complainant agsipud ta adda daytoy iti maikadua a kadsaaran ti stall daytoy.
Ditoy metten a nadlaw ti maysa a barangay kagawad ti suspek a nagapu manipud iti kabangibang nga stall ken nagturong iti nakadisplay-an dagiti “kiniing” a lako ti complainant.
Nakita metlaeng ti witness nga idi nakadanun ti suspek iti area nga ayan dagiti “kiniing” ket pinartakanna daytoy a nagala sakbay a pimmanaw bayat nga ip-ipitenna ti pakete ti kinning iti akin-kanigid nga ima ken iti tyanna.
Limed met a sinurot daytoy ti barangay kagawad agingga a nakadanun dagitoy iti terminal ken ditoy metten nga inturongna daytoy iti kaasitgan a police community precint office.
Ditoy metten a napakaammuan ti biktima a natakawan daytoy ngem natiliw ti suspek babaen iti maysa kadagiti saleslady daytoy.
Gapu iti dayta, naiturong metten ti suspek iti Baguio City Police Office Station 7 para iti kanayunan nga imbestigasyon ken nadiskobre metten iti suspek dagiti innem a pakete ti nasao a kiniing nga aggatad iti P2,200.
Manarimaan metten a maad-adal ti kaso a maipila kenkuana.//Bombo Noveh Organo
