Natiliw ti maysa a lalaki gapu iti panaglabsingna iti Republic Act No. 10591 wenno iti Comprehensive Firearms and Ammunition Regulation Act idi nagresponde dagiti kameng iti Bangued Municipal Police Station (MPS) iti maysa a report ti maysa a concerned citizen iti gulo idiay Washington Street, Zone 2, Bangued, Abra.
Maibasar iti report, nakaawat iti awag ti pulisya manipod iti concerned citizen seknan iti mapapati a gulo iti nasao a lugar. Dagos a nagresponde dagiti pulis ken idi nakadanon dagitoy iti lugar ket nakitada ti suspek nga adda iggemna a paltog ken pinadasna nga iserrek iti bulsana.
Napartak nga inasitgan dagiti pulis ti suspek ken nakumpiskar manipod kenkuana ti maysa a Caliber .22 Beretta pistol nga addaan iti bala iti chamber. Idi kiddawen dagiti otoridad ti kaskenan a dokumento para iti ligal nga agtagikua iti paltog, napaay ti suspek a mangipakita iti papeles isu’t gapuna a dagos a natiliw daytoy.
Iti naisayangkat a panagsukimat iti sling bag iti suspek, narekober pay dagiti pulis ti uppat a bala para iti Caliber .22 ken tallo a bala para iti Caliber .45.
Ti suspek, kadua iti nakumpiskar a paltog ken dagiti bala, ket adda ita iti kustodiya iti Bangued MPS para iti umno a dokumentasyon ken makasuan iti panaglabsing iti RA 10591.
