Agpatpataming ita iti pag-agasan ti maysa a baro a kaipaspasngay a maladaga a babai a nasarakan iti igid ti maysa a balay idiay Pinget, Baguio City pasado alas-kuatro itay laeng parbangon, ita nga aldaw.
Sigun iti maysa a residente, nakanggeg daytoy ti panagsangit iti ruar ti pagtaenganda isut gapuna a dagos a rimmuar ken naimatanganna ti nasao a maladaga.
Kinunana nga awan ti balkot wenno bado ti maladaga ken nakaikarga iti eco bag ti placenta ken ti umbilical cord daytoy.
Kabayatanna, agtultuloy metten ti imbistigasyon dagiti otoridad tapno mabigbig ti ina daytoy.
Iti panakiuman ti Bombo Radyo kenni Police Major Jayson Eugenio, Cheif of Police ti Baguio City Police Station 2, kinunana nga agarup maysa nga oras a naibati ti nasao a maladaga iti nakaibatianna sakbay a naispal daytoy.
Nagyaman met daytoy iti nakakita iti nasao a maladaga ta naiturong daytoy a dagus iti ospital agsipud ta nakapasar daytoy iti hypotermia.
Makikikoordinar met dagitoy kadagiti barangay opisyal tapno sukimaten ti rekords dagiti masikog wenno dagiti naganak.
Kagiddan dayta, impetteng met ni Pablo Pawi Jr., barangay captain ti nasao a barangay a manarimaan ti panakikoordinar dagitoy kadagiti barangay health workers.
Naextract metten ti CCTV sadiay no sadino maysa laeng nga indibidual ti naimatangan itay parbangon.
Nupay kasta, possible a ti nanang ti nasao a maladaga ket maysa metlaeng kadagiti boarders sadiay.//via Bombo Noveh Organo
