Impetteng ni Eliseo Balariz Jr., maysa a male breast Cancer Survivor a ti Breast Cancer ket saan laeng a mapaspasamak kadagiti babbai, daytoy ket maysa a sakit a posible met laeng a mapasaran dagiti lallaki.
Iti pannakiuman ti Bombo Radyo kenkuana, imbinglayna dagiti napasaranna bayat ti panaglasatna iti nadakamat a sakit.
Kinunana nga idi tawen 2018, idi aktibo pay daytoy nga agbasbasketball, nasikil ti barukongna.
Nupay kasta, saanna inkaskanu ti sakit a nariknana, agingga a dimteng ti panawen ti pandemya nu sadino nariknana a natangken daytoy.
Nagpabiopsy met daytoy nga isu met ti nakaduktalanda iti sakitna.
Gapu iti dayta, al-allukoyenna dagiti tattao, babae man wenno lalaki nga agpa-screening metlaeng maipapan iti breast cancer gapu ta awan pilpilyen daytoy a sakit.
Impaganetgetna metlaeng ti kinapateg ti early detection ken prevention.
Maipalagip met a naangay idi kalman ti free screening ken check up iti breast ken cervical cancer kas paset ti Breast cancer awareness month ita a bulan.
