ATOK, BENGUET – Kinumpirmar ni Atok Mayor Franklin Smith nga adda ti maysa a mannalon a pimmusay gapu iti aksidente idiay Langilang Paoay, Atok, Benguet itay nabiit.
Immunan a nabigbig ti pimmusay a ni Mr. Mark Aison Singlao bayat a natalged met ti kasasaad ti kadwana a ni Mr. Adler Sarac.
Maibasar iti imbestigasyon ti Atok Municipal Police Station, agibiahe koma ti biktima ken ti helper iti nateng idiay La Trinidad, Benguet idi malem ti Hulyo 23.
Nupay kasta, idi adda dagitoy idiay Barangay Paoay ket nabitin ti lugan iti pasang-at a paset ti kalsada.
Inkagumaan ti helper a ni Sarac a kalsuan ti lugan ngem saanna a nabaelan rason a nagatras ti lugan ken natnag iti 50 meters ti kaunegna a rangkis.
Nakapasar iti nakaro a dunor ti driver a nangitunda iti dagus nga ipupusayna.
