BAGUIO CITY- Pimmusay ti maysa a mine development supervisor kalpasan a nagaburan iti natnag a batbato iti Philex Mining Corporation sadiay Camp 3, Tuba, Benguet idi malem kalman.
Nabigbig daytoy a ni Danny Bunnag Dammit, 41-anyos, mine development supervisor ken residente ti Camp 3, Tuba, Benguet.
Maibasar iti imbestigasyon, manarimaan ti panagtrabaho ti biktima ken ti kadwana iti 798 meter level idi killaat a nargaay dagiti batbato.
Gapu iti daytoy, natamaan ken nagaburan ti biktima iti batbato bayat a nakataray met ti maysa a kadwana.
Iti phone interview ti Bombo Radyo, kinuna ni IOC PSSG Jefferson Taruc, nagpaut iti sumagmamano nga oras sakbay a narekober dagiti rescuers ti bagi ti biktima.
Intaray da ti biktima iti ospital ngem naideklara kas dead on arrival.
Sigun iti doktor, pimmusay ti biktima gapu iti cardio pulmonary arrest secondary to asphyxia.
Iti agdama ket ikagkagumaan ti Bombo Radyo Baguio nga alaen ti benneg ti maseknan a pagminasan.
