Kinumpirmar ti Davao regional police a maysa a miyembro ti Kingdom of Jesus Christ (KOJC) ket pimmusay kabayatan ti operasyon dagitoy para iti panakaipaay iti arrest warrant kenni Pastor Apollo Quiboloy.
Sigun iti Davao Police Regional Office XI, pimmusay ti lalaki a miyembro ti Kingdom of Jesus Christ (KOJC) gapu iti heart attack kabayatan ti panakaipaay ti warrant iti Kingdom of Jesus Christ (KOJC) compound sadiay Buhangin District, Davao City.
Naiturong met daytoy iti ospital ngem, naideklara a dead on arrival.
Gapu iti dayta, inyebkas dagiti otoridad ti panakiladingitda iti pamilya daytoy ngem impeksada a ti ipupusay daytoy ket awan kainaiganna iti ipatpatungpal dagitoy nga operasyon.
Pinaglibakan met dagiti otoridad a saan dagitoy a nagaramat iti tear gas.
Kabayatanna, maipalagip nga impaganetget ti Police Regional Office 11 idiay Davao City idi kalman a saanda a pumanaw agingga a saanda a mabirukan ken makemmeg ni Pastor Apollo Quiboloy iti compound ti simbaan a Kingdom of Jesus Christ.
Sigun kenni Police Regional Office 11 Director Police Brigadier General Nicolas Torre III, adda ni Quiboloy iti nasao a lugar ken mailimlimmeng laeng daytoy.
Inlawlawagna pay iti publiko a kasapulan a maawatanda nga awan ti piansa ti warrant of arrest para kenni Quiboloy ken ti uppat a kakaduana.
