Pimmusay ti 45-anyos a jail guard kalpasan a pinaltugan ti saan pay a nabigbig a suspek idiay Barangay Taleb, Bantay, Ilocos Sur.
Nabigbig ti biktima a ni Jayson Barrientos Parchamento, prison guard 3 iti Ilocos Sur Provincial Jail ken agnanaed idiay Barangay VII, Vigan City bayat a ti suspek ket saan pay a nabigbig.
Maibasar iti inisyal nga imbestigasyon ti pulisya, nakalugan iti Hyundai i10 Eon hatchback ti biktima paturong iti trabahona idi pinaltugan ti saan pay nabigbig a suspek.
Naitaray ti biktima iti ospital ngem saanen a nakalasat.
Narekober iti nakapasamakan ti krimen ti walo a bala ti caliber 45.
Ti biktima ket sigud a pulis a nakadestino iti Police Regional Office 1 idiay San Fernando City, La Union ngem nadismiss gapu iti panag-AWOL-na, wenno Absent Without Leave.
Iti agdama ket maim-imbestigaran ti motibo iti pannakapaltog ti biktima.//VIA Bombo Radyo Vigan
