Dagos nga imbilin ni Laoag Mayor James Bryan Alcid kadagiti kameng iti hilippine National Police idiay Laoag City nga imbestigranda ti viral video ni sigud a Barangay Chairman Dan Toledanes iti Barangay 2, Laoag City nu sadinno mabuya ti mapapati a panangkabkabilna iti dua nga empleyadona.
Kinondenar ti nasao nga opisial ti inaramid ti sigud a kapitan.
Nupay kasta, kuna ni Mayor Alcid a saan pay a masinunuo no kaanu a napasamak ti insidente, no ania ti rason no apay a maipagarop a kinabkabil ti sigud a kapitan dagiti dua a saan pay a nabigbig nga empleadona.
Kinuna ni Alcid nga ipaimana iti Philippine National Police ti pannakaimbestigar a naimbag ti napasamak ken saan a nasken a makiballaet no di ket iyuray na lattan ti written report manipod kadagiti otoridad tapno maamoan ti agbalin a resulta daytoy.
Inlawlawag ti mayor a narigat a makibiang ti lokal a gobierno iti siudad ti Laoag nangruna ket maibilangen ni Toledanes kas maysa a private individual kalpasan a naglusulos kas Barangay Chairman iti Brgy. 2 iti ciudad ti Laoag.
Impakaammo ni Alcid a personal ti rason ti panaglusulos ni Toledanes iti kallabes ken saan a political. | via Bombo Radyo Laoag
