ABRA – Nadangran ti maysa a soldado kalpasan ti rinnupak iti nagbaetan ti 50th Infantry Battalion ken miyembro ti Kilusang Larangang Guerilla (KLG) North-Abra idiay Barangay Nagcanasan, Pilar, Abra idi kalman, Abril 2.
Kasaruno iti daytoy, nasuspendir met ita nga aldaw ti klase iti primary ken secondary level kadagiti parapubliko ken pribado a pagadalan idiay Pilar, Abra ita nga aldaw.
Immunan a naipadamag babaen kenni Army Major Rigor Pamittan, spokesperson ti 5th Infantry Division a nangipatungpal ti 50th Infantry Battalion ti security operation iti nasao a lugar idi naka-engkwentroda dagiti armado a grupo.
Nagpaut ti rinnupak iti uneg ti lima a minutos sakbay nga immatras dagiti Komunista a Guerilla.
Iti met agdama ket agtaltalinaed pailaeng dagiti residente ti Barangay Nagcanasan iti gymnasium ti Poblacion, Pilar, Abra para iti seguridad dagitoy.
