Pimmusay babaen ti panagpakamatay iti pagbaludan ti maysa a Swiss national a nakemmeg ken naakusaran nga ag-espia idiay Iran, sigun iti Mizan Online, maysa nga ahensia ti Iran.
Ti kaso ti Swiss citizen a saan pay a naipakaamo ti kinasiasinona, ket maad-adal ken maipoproseso kalpasan a nakemmeg gapu iti “espionage” wenno panagespia.
Kinumpirmar ti Federal Department of Foreign Affairs (FDFA) ti Switzerland ti ipupusay ti Swiss citizen idiay Iran.
Sigun iti Federal Department of Foreign Affairs (FDFA), makikikoordinarda kadagiti lokal nga otoridad tapno mailawlawag ti ipupusay ti balud nga Iranian.
Ti pagbaludan ti Semnan ket agarup 190 a kilometro iti daya ti Tehran, ti capital ti Iran.
Maibasar iti imbestigasion dagiti otoridad, ti Swiss citizen, a nakabalud iti pagbaludan ti Semnan ket kiniddawna iti kaduana iti selda nga ipaayna kenkuana ti taraon manipud iti prison buffet.
Nagturong met ti kaduana iti prison buffet a rason ti pananggundawayna nga agpakamatay gaputa agmaymaysa daytoy iti uneg ti pagbaludan.
Pinadas dagiti opisial ti pagbaludan nga isalakan ti lalaki ngem saan a nagballigi dagitoy.
