Mapadpadaan ti maysa kadagiti kadakkelan a Bagong Serbisyo Fair iti intero a pagilian ken ti kaunaan iti probinsiya ti Benguet inton Domingo, Abril baente uno agingga baente dos ti agdama a tawen iti Benguet State University sadiay La Trinidad, Benguet.
Daytoy ket mangrugi iti oras nga alas sais ti agsapa agingga alas singko ti malem.
Iti panakiuman ti Bombo Radyo kenni Kevin See, Chief of Staff ti Benguet Congressional Office, kinunana a maysa daytoy a prebilihiyo ken adda a magagaranda para iti panakaipatungpal daytoy agsipud ta agarup tallo gasu’t ti serbisyo a maipaay iti publiko.
Daytoy ket pakairamanan ti serbisyo ti Department of Health (DOH) a check-up, panangipaay ti medisina ken daduma pay; ti serbisyo ti Department of Labor and Employment (DOLE) a pakairamanan ti job fair manipud kdagiti agarup 50 a kompanya iti pagilian; ti serbisyo ti Department of Foreign Affairs (DFA) a passports on wheel; ti serbisyo ti Overseas Workers Welfare Administration (OWWA) a maipapan kadagiti Pilipino nga adda sadiay ballasiw-taaw, ti panakaipaay ti cash assistance ken daduma pay.
Sigun kenni See, adda ti dua a wagas tapno maka-avail iti nasao serbisyo, daytoy ket babaen ti panagrehistro iti Bagong Pilipinas Serbisyo Fair website ken ti panangipakitada iti QR code wenno ti panagwalk-in.
Kinuna ni See, daytoy a serbisyo fair ket one-stop-shop gapu ta adda amin dagiti serbisyo a kasapulan ti publiko.
Malaksid kadagiti nagduduma a serbisyo, manamnama met ti konsierto a maisayangkat iti Open Ground ti Benguet State University inton Domingo iti oras nga alas singko ti malem ken daytoy ket pagperforman da Bamboo, Daren Espanto, ILT Band, Ingrid Payaket ken ti panaghost ni Wacky Kiray ken daduma pay.
Innayon ni See a kadagiti agnumar iti serbisyo fair ket adda pay tsansa a mangabak dagitoy kadagiti raffle items.
Kabayatanna, adda a nakikoordinardan kadagiti nagduduma nga organisasyon ti gobyerno nangruna iti Philippine National Police para iti panangipasigurado a naurnos a maipatungpal daytoy.//M
