Nagpositibo iti iligal a droga ti maysa kadagiti lima nga empleyado ti Land Transportation Office (LTO) Region 2 a nakemmeg iti naipatungal nga entrapment operation idi Setiembre a uno, idiay Bambang, Nueva Vizcaya.
Daytoy ket babaen ti panangkumpirma dagiti kameng ti Nueva Vizcaya Police Provincial Office.
Maipalagip a nakemmeg ti lima a suspek kalpasan a naireklamo ti mapapati panangkikilda kadagiti motorista.
Iti insayangkat a search operation ti Bambang police, narekober ti ₱40,000 marked money, tallo nga igam, nagduduma a driver’s license, maysa a sachet ti maatap a shabu, dua a lighter ken drug paraphernalia.
Sigun kenni Police Colonel Paul Bometivo, Provincial Director ng Nueva Vizcaya Police Provincial Office, rimmuar iti naisayangkat a drug test a nagpositibo ti maysa kadagiti natiliw nga LTO Enforcer.
Natakuatan nga adda dagiti para kadagiti tallo a paltog a nakumpiskar, ngem naamuan a personal a kukua dagitoy ken saan nga opisial nga alikamen ti LTO.
Napilaanen dagitoy iti reklamo a panaglabsing iti Anti-Graft and Corrupt Practices Act, Code of Conduct and Ethical Standards for Public Officials and Employees, ken kanayunan a kaso iti sidong ti RA 9165 wenno Comprehensive Dangerous Drugs Act dagiti suspek a nagpositibo iti iligal a droga.
Idi laeng Setiembre, simmangon dagiti akusado iti sanguanan ti piskalya.
Kinumpirmar metlaeng ni Police Major Randy Velarde, hepe ti Bambang Police, a positibo iti shabu ti naala a sachet, ken naduktalan metlaeng ti shabu residue iti tube pipes a narekober manipod iti bag ti maysa kadagiti suspek.
Nakadestino dagiti suspek iti Regional Office ti LTO-Tuguegarao City ken saan a residente ti probinsia ti Nueva Vizcaya.
Iti agdama, adda dagiti suspek iti kostodiya ti pulisia bayat a maur-uray ti resolusion dagiti kaso dagitoy.
