photo credit to Abra Radio – Joy FM
BAGUIO CITY – Naduktalan a maysa kadagiti paltog a nakumpiskar iti naabandona a campaign vehicle a nairaman iti pammaltog sadiay Budac, Tayum, Abra ket tagikua ti mayor ti Lagayan, Abra a ni Jendricks Seares Luna a kaanakan ni Abra congressional bet Vicky Seares-Corpus.
Kinumpirmar ti Firearms and Explosives Office ti Philippine National Police iti Initial Firearm’s Holder Verification Report daytoy a ti caliber 5.56 Nveske a rifle nga addaan lisensia a nagpaso idi January 14, 2011 ket nakarehistro kenni Mayor Luna.
Maipalagip a malaksid iti nasao a rifle ket adda pay ti nakakumpiskar dagiti pulis iti innem a dadduma pay a nabibileg a paltog ken nasurok 100 a bala manipud iti pick-up truck nga inabandona ti kampo ni Tayum mayoral bet Jose Mari Brillantes.
Nupay kasta, awan ti naduktalan nga akinkukua kadagiti nasao a paltog.
Nakumpiskar dagiti nasao a paltog ken bala babaen iti bileg ti search warrant nga impaulog ni Acting Executive Judge Gina Juan Chan ti Regional Trial Court – Branch 22, Narvacan, Ilocos Sur.
Naduktalan met a ti pick-up truck nga addaan ti campaign poster da Seares-Corpus ken gubernatorial bet Dolores mayor Robert Seares Jr. ket nakarehistro iti maysa nga opisyal ti Lagayan LGU.
Maipalagip a ti nasao a pick-up truck ket inaramat da Brillantes idi April 23 idi pinapaltoganda ti lugan ti kapitan ti Budac, Tayum.
Nagramot ti pammaltog idi nagbinnara ti live-in partner ni Brgy. Capt. Walter Tugadi ken ni Brillantes bayat nga agkamkampanya daytoy sadiay ken idi pumanaw kuman ti nasao a live-in partner ti kapitan ket killaat a pinaltogan ti grupo ni Brillantes ti lugan ti kapitan isut gapuna a nagbales dagitoy.
Gapu iti daytoy, manamnama a pagpalawagen dagiti otoridad ni Mayor Luna
