BAGUIO CITY – Simmuko iti Philippine Army ken iti Kalinga Police Provincial Office ti maysa a kameng ti Squad Tres ti Marcial Daggay Command ti Kilusang Larangang Gerilya “Baggas” ti Ilocos-Cordillera Regional Committee ti New People’s Army idi malem kalman.
Binigbig ni Lt. Col. Gulliver Señires, dadaulo ti 50th Infantry Battalion ti Philippine Army ti nasao a surrenderee a ni Junifer Tubban alyas James, 34 anyos, baro ken residente ti Balbalan, Kalinga.
Kinunana nga addaan iti warrant of arrest ni Tubban gapu iti kaso a frustrated murder.
Naamuan nga idi malem kalman ket nagsango ti rebelde ken ti complainant a ni Jayson Bagsao iti Regional Trial Court Branch 35 para iti panagtinnunos dagitoy.
Nawaswas met ti bileg ti warrant of arrest kalpasan a nangipila ti complainant iti motion for exclusion nga inaprobaran met ti korte.
Naipasidong metten ti surrenderee iti custodial debriefing.
