Kinumpirmar ti Philippine Coast Guard a nakaalada ti sabali manen a bangkay manipod iti nabaliktad nga MV Hong Hai 16 iti agtultuloy nga underwater search efforts iti danum iti taaw ti Rizal, Occidental Mindoro.
Sigun iti Coast Guard District Southern Tagalog, ti bangkay ket narekober iti agarup 3:56 p.m. manipud iti accommodation area ti barko bayat ti agtultuloy a joint diving operations.
Nasarakan ti bangkay babaen ti panagregget ti Special Operations Group-Southern Tagalog ken technical wreck divers manipud iti Special Operations Force, a naidestino manipud Manila tapno mapatibker ti search and rescue mission.
Iti agdama, maberberipikar paylaeng ti kinasiasino ti pimmusay.
Maipalagip a ti Hong Hai 16 ket nabaliktad idi napalabas a lawas, ken lima a crew members ti naipadamag a mapukpukaw.
