BAGUIO CITY – Nagpabigbig ti maysa nga expatriate nga agbakbakasyon ditoy siudad ti Baguio ken nagpositibo iti COVID-19 tapnu agserbi a ballaag kadagiti nakapulapolna.
Ni Rafael Serrano, 59-anyos a residente ti Amistad, Camp 7 ken agbakbakasyon manipud sadiay New York ti maikapat a pasyente a nagsungbat iti apela ni Mayor Benjamin Magalong a panagpabigbig dagiti nagpositibo iti COVID-19 ditoy siudad tapnu mapapartak ti contact tracing ken maisardengen ti panagwaras ti virus.
Imbingayna a nariknana dagiti sintomas ti COVID-19 idi March 16 kalpasan a nagtaud sadiay Bangkok, Thailand idi March 12.
Nagturong daytoy iti sumagmamano nga establishimento ditoy Baguio idi March 16 ken dimmar-ay iti panagrambak ti pamilyada idi March 19.
Nagpa-physical therapy daytoy iti SLU Hospital idi March 20 ken 22 sakbay a na-admit iti Baguio General Hospital and Medical Center idi March 27 ken rimwar ti resulta ti COVID test daytoy idi March 28.
Nabirukan metten ti City Health Services Office dagiti indibidual a nakapulapol ni Serrano ken guyguyuguyenda pay dagiti dadduma a nakapulapolna manipud idi March 14 iti panag-self-quarantine dagitoy.
Maipalagip nga immunan a nagpabigbig ni Joel Junsay ken ti agasawa nga Enrique ken Jaysay Bactad kas COVID-19 positive patients kas panagsungbatda iti apela ni Mayor Magalong.
