BAGUIO CITY – Burburtiya pay laeng kadagiti otoridad nu anya ti motibo iti panangpapatay dagiti saan pay a nabigbig a suspek iti maysa a taxi driver sadiay Badiwan, Poblacion, Tuba, Benguet idi kanikadua.
Nabigbig ti biktima a ni Roberto Albino, 47-anyos, tubo ti Pangasinan, residente ti Km. 4, Asin Road, Baguio City ken ti imanmanehona a taxi ket addaan iti plaka nga AYS-992.
Segun iti Tuba PNP, naklaat laengen ti gwardiya ti maysa a pasdek sadiay idi nakangeg daytoy iti nagsasaruno a busina agingga a nagsardeng ti nasao a taxi iti batog dagitoy.
Inasitganna ti taxi ken sadiay a nakitana ti biktima a nadigos iti bukodna a dara.
Dagus nga inreportna ti insidente iti pulisya ken iti panagresponde dagiti otoridad ket nakitada ti biktima a nakatugaw iti driver’s seat nga awananen iti biag.
Iti met panangiproseso ti Scene of the Crime Operatives ket naamoan a nagsagrap ti biktima iti bagsol iti tengnged daytoy.
Iti agdama ket agtultuloy ti imbestigasyon ti pulisya iti nasao a krimen nangruna ta saan met a nagargaraw dagiti personal belongings ti nasao a taxi driver.
Maipalagip a hinold up ken tinakawa dagiti saan pay a nabigbig a suspek ti maysa a taxi driver sadiay Km. 4, Asin Road, Baguio City idi napalabas a lawas.
Ti biktima ket nagsagrap met laeng iti bagsol iti tengnged ken iti barukong daytoy.
