Naarestar ti maysa nga agtawen iti 27 a lalaki iti naipatungpal a buy-bust operation idiay Barangay Pinsao Proper, Baguio City idi laeng Biernes, October 25, 2024.
Nabigbig daytoy a ni Jobert Zabala alyas “Dodges” maysa a construction worker, ken residente iti Barangay City Camp, Baguio City.
Nakumpiskar manipod kenkuana ti drug evidence a pakairamanan iti maysa a pakete iti maatap a shabu nga agdagsen iti mapatta-patta a maysa a gramo ken addaan iti Standard Drug Price a Php6,800.
Malaksid iti dayta, nakumpiskar metlaeng dagiti daduma a kagawaan kas iti maysa nga android phone, maysa a five hundred peso bill iti rabaw ti onse a piraso iti five hundred peso bill boodle money, uppat a piraso iti one hundred peso bill, maysa a fifty peso bill, ken coins.
Ti akusado ken dagiti ebidensya a nakumpiskar manipod kenkuana ket naiturong iti opisina iti Special Operations Unit-Cordillera para iti dokumentasyon ken disposisyon.
Kalpasan dayta, maipaima iti Regional Forensic Unit-Cordillera dagiti drug evidence para iti panakaipatungpal iti laboratory examination bayat a maiturong met iti kustodiya iti Baguio City Police Office-Police Station 2 ti akusado.
Ti operasyon ket naipatungpal babaen iti natitipon a pwersa iti Philippine National Police-Drug Enforcement Group(lead unit), Special Operations Unit-Cordillera, Baguio City Police Office-Police Station 2, ken ti Mobile Patrol Unit.//Bombo Jerwin Aquino
