Naaksidente ti maysa nga elf truck a naglaon iti nateng a sayote idiay Belong, Barangay Ambassador, Tublay, Benguet pasadao alas-dos ita a malem.
Sigun iti lokal a gobyerno ti Tublay, paturong ti nasao a truck a naglaon iti sayote idiay Benguet Agri-Pinoy Trading Center (BAPTC) ken sakay daytoy ti uppat nga indibidual.
Bayat iti isasang-at ti nasao a truck iti pangato a paset ti kalsada, nastuck daytoy iti nauneg a paset ti kalsada gapu iti napigsa a panagayos ti danum.
Gapu metlaeng iti nadagsen a karga daytoy a nateng, nagbalin nga unstable ti lugan, ket ditoy metten a nagbaliktad.
Nag-self evacuate met dagiti uppat nga indibidual a nakalugan iti nasao a truck ken nagturongda iti asideng a waiting shed.
Dagos met nga impakaammo daytoy dagiti barangay officials ti Barangay Ambassador iti LGU Tublay babaen iti emergency hotline ken nagkiddawda iti dagos nga assistance.
Nagresponde ditoy dagiti kameng ti Tublay Rural Health Unit (RHU), Bureau of Fire Protection (BFP)-Tublay, ken Tublay Municipal Police Station (TMPS).
Iti agdama, naiturong metten dagiti uppat nga indibidual iti pagagasan para iti pannakatamingda.
Gapu iti napasamak, nagballakad manen ti lokal a gobyerno ti Tublay kadagiti motorista nga aganadda gapu iti mapaspasaran a saan a nasayaat a paniempo. //bombokaren.c.sapirao
