Pimmusay ti maysa nga indibidual nga agtawen iti 31, residente iti Tawang, La Trinidad, Benguet kalpasan nga aksidente a naidungpar daytoy ti lugan nga imanmaneho ti 48-anyos a lalaki, maysa a singer, iti intersection ti Ben Palispis Highway ken Bengao, Baguio City idi May 24.
Iti imbestigasion ti pulisia, paturong iti City Proper ti motor nga imanmaneho ti biktima manipod idiay Barangay Dontogan, Green Valley, Baguio City.
Apaman a nakadanon dagitoy iti lugar a nakapasamakan ti insidente, aksidente a naidungpar iti front-right bumper iti lugan nga agturong iti kaniggid paturong idiay Bengao.
Gapu iti napigsa nga impact iti napasamak nga insidente, natumba ti biktima ken nagsagrap iti pannakadunor.
Naitaray daytoy iti ospital para iti pannakatamingna ngem nupay kasta, naideklara metlaeng a pimmusay iti isu metlaeng nga aldaw.
Natakuatan a pimmusay ti biktima gapu iti brain herniation.
Iti report dagiti otoridad, boluntario a simmuko ti drayber iti pick-up.
Maisagsagana metten ti kaso a maipila kontra iti drayber ti lugan.
