Maysa nga indibidwal ti kumpirmado a pimmusay iti panagcollapse iti landfill facility idiay Barangay Binaliw, Cebu City idi kalman iti malem kagiddan ti napasamak a landslide.
Iti kaudian a report dagiti otoridad, addan dagiti siam a naarayat a naiturongen iti pagagasan bayat nga adda pay dagiti daduma a posible a na-trap iti uneg ti nasao a pasilidad.
Kaadwan kadagiti biktima iti insidente ket trabahador iti Material Recovery Facility (MRF).
Kinumpirmar met ni Cebu City Mayor Nestor Archival a dagus nga immarayat dagiti kameng iti disaster response team katsa metten a naideploy a dagus dagiti first responders.
Agingga idi rabii ket nagtultuoy latta ti search and rescue operations tapno makita dagiti nabatbati pay iti nag-collapse a pasilidad.
Impanamnama met ni Mayor Archival a nainget ita a banbantayanda ti sitwasyon ken kidkiddawenna ti panagtalinaed kalmado ti publiko wenno dagiti umili sadiay ken liklikanda ti agturong iti nasao a disso.
