Pimmusay ti maysa nga indibidwal iti napasamak nga uram idiay Camp 6, Kennon Road, Tuba, Benguet ita nga umuna nga aldaw iti 2025.
Iti panakiuman iti Bombo Radyo kenni Fire Chief Inspector Jesus Yango, Acting Provincial Fire Marshal iti Bureau of Fire Protection-Benguet, kinunana a ti pimmusay ket residente metlaeng iti nasao a lugar.
Maibasar iti impormasyon manipod iti nasao nga opisina, dumanon iti mapatta-patta a Php10 million ti danyos daytoy nu sadino, dumanon 26 a pasdek iti nauram ken 36 a pamilya iti naapektaran.
Innayon ni Yango a naireport kadakuada ti uram 1:25 itay parbangon nu sadino, naideklara a fire under control 4:25 metlaeng iti parbangon, bayat a naideklara met ti fire out 6:30 itay agsapa.
Dinakamatna a ti uram ket dimmanon iti third alarm.
Iti agdama, manarimaan paylaeng ti imbestigasyon dagitoy iti rason iti panakapasamak iti umuna nga uram iti 2025.//Bombo Newsteam
