BAGUIO CITY – Nakemmeg ti maysa nga wanted person idi kalman, Abril 29 gapu iti kasona a maatap a panagrames iti tallo nga agkakabsat a menor de edad.
Kasaruno daytoy ti operasyon ti nagtipon a pwersa ti La TrinidadMun. Police Station ken Benguet CIDG para iti panakaiyulog ti warrant of arrest ti suspek.
Maibasar iti report, kaaruba ti suspek dagiti biktima nu sadinno nangrugi ti panagarimidna iti sekswal a panag-abuso iti maysa kadagiti biktima nga agtawen pay ti 7-anyos idi 2014 .
Simaruno a nabiktima ti agtawen met iti 10-anyos a kabsat daytoy idi 2017 ken intuloyna nga inabuso dagitoy agingga idi 2018.
Nangrugi met ti maatap a panag-abusona iti maikatlo a biktima idi November 23, 2021 kagiddan ti maika-11 a panagkasangay ti nasao nga biktima.
Amin dagiti insidente ti sekswal a panag-abuso ket napasamak iti nagduduma nga okasyon nu sadinno pasuksukanna iti kwarta ken cellphone dagiti inosente a biktima tapnu maipatungpal ti panag-abuso.
Napasamak met idi February 15, 2022 ti kaudian nga insidente nu sadinno nagdesisyon dagiti biktima nga agkiddaw ti tulong iti opisina ti Kongresista ti Benguet.
Ditoy metten a naipaayan iti legal ken financial assistance dagiti biktima kagiddan ti panakaisagana ti kaso a maipila iti suspek a nagresulta met iti panakaiyulog ti warrant of arrest daytoy.
Impeksa met ni Benguet PPO Provincial Director PCOL Reynaldo Pasiwen ti panangtubngarda iti nasao nga pasamak nangruna dagiti indibidual a makadadael iti masakbayan dagiti masungad a namnama ti probinsia.
